रेबिज रोग नियन्त्रण गर्न प्युठानमा सामुदायिक तथा घर पालुवा कुकुरको बन्ध्याकरण

रविन विश्वकर्मा, प्यूठान ।प्यूठानमा सामुदायिक तथा घरपालुवा कुकुरको बन्ध्याकरण गर्न थालिएको छ । एकीकृत कृषि तथा पशुपन्छि बिकास कार्यालय प्यूठानले अभियान मार्फत कुकुरको बन्ध्याकरण गर्न थालेको हो । “ अवरोध हटाऔँ, रेबिज उन्मुलन गरौँ” भन्ने मुल नाराका साथ कार्तिक ९ गते देखि १५ गते सम्म सामुदायिक तथा घरपालुवा कुकुरको बन्ध्याकरण गर्ने गरी अभियान सञ्चालन गरेको कार्यालयले जनाएको छ ।

सामुदायिक कुकुरको सङ्ख्यामा कमी ल्याउन, रेबिज रोगको नियन्त्रणका लागि कुकुरको बन्ध्याकरण कार्यक्रम सञ्चालन गरेको निमित्त कार्यालय प्रुमख उमेश चन्द्र श्रेष्ठले बताउनुभयो । सामुदायिक तथा घरपालुवा कुकुरका कारण समस्या बढेपछि जिल्लामा बन्ध्याकरण गर्न थालिएको श्रेष्ठको भनाइ छ ।

अभियानको पहिलो दिन आज २ वटा घर पालुवा र ४ वटा सामुदायिक कुकुर गरी ६ वटाको बन्ध्याकरण गरिएको कार्यालयका पशुविकास अधिकृत डाक्टर गणेश पुनले जानकारी दिनुभयो । कार्तिक १५ गते सम्म गाडिमा जिल्लाका बिभिन्न ठाउँहरुबाट सामुदायिक तथा घरपालुवा कुकुर ल्याएर कार्यालयमै बन्ध्याकरण गर्ने बताउनुभयो । बन्ध्याकरण, उपचारसंगै कुकुरलाई रेबिज विरुद्ध खोप पनि लगाइने डाक्टर पुनले बताउनुभयो । अभियानमा डा. गणेश पुनसंगै डा.राम भरोस यादब, पशु प्राविधिकहरु नरेश पाठक, विकास नेपाली लगायतको टोलीले शल्यक्रिया गर्नुभएको छ ।

कार्यालयले यस अघि जेठ २० र २१ गते पशु सेवा शाखा बिजुवारमा प्यूठान नगरपालिकाको समन्वय र पायोनिएर एनिमल हस्पिटल एण्ड रिसर्च सेन्टर प्रालि बुटवलको प्राबिधिक सहयोगमा शिबिर संचालन गरेर ७५ वटा सामुदायिक कुकुरको बन्ध्याकरण गरेको थियो ।