प्युठानमा भिरबाट लडेर एक जनाको मृत्यु

प्युठानको नौबहिनी गाउँपालिका–६ लुङ लेकमा भिरबाट लडेर एक व्यक्तिको मृत्यु भएको छ।

गुल्मीबाट घर फर्किने क्रममा स्थानीय ५१ वर्षीय मत बहादुर के.सी.को भिरबाट लडेर मृत्यु भएको हो। बिहीबार (असार ४ गते) साँझ करिब ७:३५ बजेको समयमा पैदल हिँडिरहेका के.सी. अचानक गोरेटो बाटोबाट करिब १५० मिटर तल घोप्टे भिरमा खसेका थिए।

उहाँ घटनास्थलमै मृत अवस्थामा फेला परेको प्रहरीले जनाएको छ। घटनाबारे सोही वडाका वडा सदस्य अमर बहादुर के.सी.ले प्रहरीलाई जानकारी गराउनुभएको थियो। घटनाको सूचना पाउनासाथ ईलाका प्रहरी कार्यालय लुङबहानेबाट प्रहरी वरिष्ठ नायब निरीक्षक शरण बहादुर भण्डारीको नेतृत्वमा ४ जना र जिल्ला प्रहरी कार्यालय प्युठानबाट प्रहरी निरीक्षक सुजन बाबु विश्वकर्माको नेतृत्वमा सोको (SOCO) टोलीसहित ५ जनाको प्रहरी टोली घटनास्थल पुगेको थियो।

उक्त घटनास्थल ईलाका प्रहरी कार्यालय लुङबहानेबाट करिब ९ किलोमिटर पूर्व–उत्तर दिशामा पर्दछ। घटनाका सम्बन्धमा प्रहरीले थप आवश्यक अनुसन्धान गरिरहेको जनाएको छ।