जसले चार सय मुरी धान फलाए

गुल्मीको धुर्कोट गाउँपालिका–६ रजस्थलका एउटै व्यक्तिले चार सय मुरी धान फलाएका छन्। स्थानीय मेघनाथ अर्यालले सो परिमाणमा धान फलाउनु भएको हो । एउटै व्यक्तिले यति धेरै धान फलाउने अर्याल जिल्लामै एक्लो व्यक्ति हुनुहुन्छ । हालसम्म उहाले तीन सय मुरी धान खेतबाट उठाइसकेको र अझै सय मुरी उठाउन बाँकी रहेको जानकारी दिनुभयो ।
अर्यालले हालसम्म ७५ रोपनी क्षेत्रफलमा लगाएको तीन सय मुरी धान उठाउनु भएको र २५ रोपनीको करिब एक सय मुरी धान उठाउन बाँकी रहेको बताउनु भयो । धान काटेर सुकाउन राखेको र अब थ्रेसर लगाएर धान र पराल छुट्याउन मात्रै बाँकी रहेको अर्यालले सुनाउनु भयो ।
उहाले सय रोपनीमध्ये ७२ रोपनी आफ्नो र २८ रोपनी भाडामा लिएर धानखेती गरिरहनु भएको छ । यसरी उत्पादन गरिएको धानबाट चामल बनाउने र प्याकेजिङ गरेर बेच्ने उहाको योजना छ । उहासंग हाल २१ वटा माउ भैँसी, एउटा ठूलो राँगो र १४ वटा पाडापाडी छन्।