प्यूठान । प्यूठानमा २०६४ भदौ २४ गतेदेखि सञ्चालनमा रहेको ग्रामीण सामुदायिक सञ्चार केन्द्रद्वारा सञ्चालित सामुदायिक रेडियो माण्डवी एफएम ९७ मेगाहर्जले आफ्नो २०औँ स्थापना दिवस तथा संस्थाको छैटौँ अधिवेशन विभिन्न कार्यक्रमसहित सम्पन्न गरेको छ। ‘समुदायको आवाज, परिवर्तनको सम्बाहक’ भन्ने मूल नाराका साथ स्थापना दिवस तथा अधिवेशन सम्पन्न गरिएको हो।
स्थापना दिवसकै अवसरमा ‘सामुदायिक रेडियोको वर्तमान अवस्था, चुनौती, अवसर र आगामी बाटो’ विषयमा विशेष अन्तरक्रिया कार्यक्रम आयोजना गरिएको थियो। कार्यक्रममा रेडियोका संस्थापक अध्यक्ष मेघराज भट्ट, पूर्व अध्यक्ष तथा मल्लरानी गाउँपालिकाका उपाध्यक्ष रमेशकुमार श्रेष्ठ र वर्तमान अध्यक्ष सञ्जय रिजाल सहभागी भई रेडियो स्थापनादेखि हालसम्म आइपुग्दा संस्थाले भोगेका चुनौती, प्राप्त अवसर तथा सामुदायिक रेडियोको वर्तमान अवस्थाबारे अनुभव र धारणा प्रस्तुत गर्नुभएको थियो।
